1  לַמְנַצֵּחַ אֶֽל-הַנְּחִילֹות מִזְמֹור לְדָוִֽד׃

 2  אֲמָרַי הַאֲזִינָה יְהוָה בִּינָה הֲגִֽיגִי׃

  3  הַקְשִׁיבָה לְקֹול שַׁוְעִי—מַלְכִּי וֵאלֹהָי כִּֽי-אֵלֶיךָ אֶתְפַּלָּֽל׃

  4  יְֽהוָה—בֹּקֶר תִּשְׁמַע קֹולִי בֹּקֶר אֶֽעֱרָךְ-לְךָ וַאֲצַפֶּֽה׃
 
 5  כִּי לֹא אֵֽל חָפֵץ רֶשַׁע אָתָּה לֹא יְגֻרְךָ רָֽע׃
  
6  לֹֽא-יִתְיַצְּבוּ הֹֽולְלִים לְנֶגֶד עֵינֶיךָ שְׁנֵאתָ כָּל-פֹּעֲלֵי אָֽוֶן׃

  7  תְּאַבֵּד דֹּבְרֵי כָזָב אִישׁ-דָּמִים וּמִרְמָה יְתָעֵב יְהוָֽה׃
  
  8  וַאֲנִי בְּרֹב—חַסְדְּךָ אָבֹוא בֵיתֶךָ אֶשְׁתַּחֲוֶה אֶל-הֵֽיכַל-קָדְשְׁךָ בְּיִרְאָתֶֽךָ׃
 
  9  יְהוָה נְחֵנִי בְצִדְקָתֶךָ—לְמַעַן שֹׁורְרָי [הֹושַׁר כ] (הַיְשַׁר ק) לְפָנַי דַּרְכֶּֽךָ׃
 
  10  כִּי אֵין בְּפִיהוּ נְכֹונָה—קִרְבָּם הַוֹּות קֶֽבֶר-פָּתוּחַ גְּרֹונָם לְשֹׁונָם יַחֲלִֽיקוּן׃
 
  11  הַֽאֲשִׁימֵם אֱֽלֹהִים יִפְּלוּ—מִֽמֹּעֲצֹותֵיהֶם בְּרֹב פִּשְׁעֵיהֶם הַדִּיחֵמֹו כִּי—מָרוּ בָֽךְ׃

  12  וְיִשְׂמְחוּ כָל-חֹוסֵי בָךְ לְעֹולָם—יְרַנֵּנוּ וְתָסֵךְ עָלֵימֹו וְֽיַעְלְצוּ בְךָ אֹהֲבֵי שְׁמֶֽךָ׃

13 כִּֽי-אַתָּה תְּבָרֵךְ צַדִּיק יְהוָה—כַּצִּנָּה רָצֹון תַּעְטְרֶֽנּוּ׃

This chaper's verses are taken from Codex Aleppo Scroll. http://www.archive.org/details/Aleppo_Codex

he verses transcribed by ing. Bodin Florin Ciprian (orynider@gmail.com) in year 2020.

Missing redish words are written in the original Death Sea Scrolls; https://downloads.thewaytoyahuweh.com/#main_pages

Broken marginal words in Scroll are with blue, http://beitdina.net/aleppo/